పేరుదేముంది

పేరుదేముంది
గుబురుమీసాలు పెంచుకున్నా
గెడ్డం గీక్కోకున్నా
పొడవాటి గోళ్ళు పెంచుకున్నా
పేరు గిన్నిస్ బుక్ లోకి ఎక్కుతుంది
పేరుదేముంది ?
రోజుకో వింత సృష్టిస్తూ
పత్రికల్లో పతాక శీర్షిక లవ్వోచ్చు
బుల్లి తెర మీద
ఇంటర్వ్యూలు ఇవ్వొచ్చు
కండలు పెంచి దున్నపోతులా తెగబలసి
ముష్టి యుద్ధం చేస్తే మహా బలుడని
ఖండ ఖండాంతరాలుగా
పేరు మారుమ్రోగవచ్చు
పేరు దేముంది ?
ఒంటి మీద అడ్డంకులోద్దని
సౌందర్యాన్నంతటిని కుమ్మరిస్తే
నక్షత్రమై వెలుగొచ్చు
ఆటలాడినా పాటలు పాడినా
పేరొస్తుంది
చేతులపై నడిస్తే వింత
పాముల్ని బల్లులని కర కర నమిలి
మింగేస్తే వింత
అరిగిపోయిన గ్రామఫోను రికార్డులా
వింతలు కూడా పాతబడ్డాయి
చివరికి మనుషులు కూడా వింత
మృగం లానే మిగిలాడు
పెరుదేముంది
పేరు రావడానికి సులువైన మార్గాలు అనేకం
పేరునూ విశ్వమంతా పరివ్యాప్తం చెయ్యొచ్చు
మనిషి గా పేరు తెచ్చు కుని గుర్తించ బడడమే
కష్టతరం
పెరుదేముంది ?
నువ్వు నీ కోసం కాకుండా
సమాజం కోసం బ్రతుకు
పేరు వద్దనుకున్నా అదే వస్తుంది
పేరు ఎక్కల్సింది గిన్నిస్ బుక్ లోకి కాదు
జనం గుండెల్లోకి
-కారం శంకర్